مقارنه رمضانيه

رمضان خلاص قرب يخلص دايما كده يخلص بسرعه والواحد مش بيحس بيه انا الحمد لله بحب رمضان ده عن اي رمضان فات ممكن لاني التزمت فيه دينيا اكتر من اي رمضان بس انا لاحظت حاجه غريبه قوي اللي اعرفه ان رمضان اوله مغفره واوسطه رحمه واخره عتق من النار يعني المفروض الواحد يستغل كل ثانيه في رمضان علشان يتغفر له او علشان ربنا يشمله برحمته او يتعتق من النار اللي لاحظته بقي ان الناس كانت في اول رمضان ماشاء الله عليها بتصلي التراويح كل يوم وملتزمه وبعدين الناس بدات تقل شويه شويه اللي ييجي يوم ويسيب يوم واللي ييجي في الاسبوع مره بس اللي ضايقني قوي اما يكون في مكان السيدات اقل من صفين او صف او يمكن اقل وده امتي ده واحنا لسه مش كنا كملنا نص رمضان استغربت قوي ده محدش يدخل الجنه غير برحمه ربنا المفروض يعني مش نستهون بالايام الوسطي من شهر رمضان قلت في عقلي يمكن علشان يستعدوا في اخر ايام رمضان للاعتكاف وكده مع انه عذر مش منطقي بس كنت بحاول ادي اي عذر علشان مش احس ان الايمان قل جوا الناس للدرجادي بس للاسف اللي صدمني النهارده اللي شفته كنا صف وفردين بس واحنا امتي علي بدايه ايام العتق من النار يعني المفروض مفيش كسل لان محدش يعرف هل هيجي رمضان غير ده علينا ولا مش هاييجي وغير كده يبقي بجد( غبي) اللي مش يستغل شهر رمضان بس فرحت جامد اما عرفت ان فيه ناس هتبدا تعتكف من غدا العصر قلت الايمان صعب يختفي من الناس بس اللي بجد نفسي اشوفه اني امشي في الشارع والاقي المسجد مليان في يوم من ايام ربنا في صلاه العصر زي ما بيكون مليان في التراوييح يوم 27 رمضان وانا صغيره كنت احب اوي امشي في الشارع يوم الجمعه واعدي مثلا جنب مسجد بفرح اما بلاقي المصلين واصلين للشارع ومثلا السكه مقفوله للعربيات من المصلين بجد بفرح بالناس دول قوي بحس انهم بجد ربنا كارمهم ورازقهم بطاعته يارب ارزقنا طاعتك يا ارحم الراحمين يا الله